|
Monday, 08 February 2010 13:10 |
|
 لاہور : چیئرمین تحریک انصاف عمران خان نے کہا ہے کہ ہر سال کرپٹ عناصر ٹیکس چوری ،کک بیکس اور دیگر غیر قانونی ذرائع سے کمائے گئے 6 سے 7 ارب ڈالر بیرون ملک بنکوں میں محفوظ کر رہے ہیں ۔ دوسری طرف بیرون ملک مقیم پاکستان بھی اتنی ہی تعداد میں زرمبادلہ پاکستان بھجواتے ہیں ۔ مگر کرپٹ حکمرانوں کی عرصہ سے جاری پریکٹس کی وجہ سے یہ زرمبادلہ ملک وقوم کے کام نہیں آرہا ۔ عمران خان نے کہا کہ نواز شریف بیرون ملک بنکوں میں محفوظ سرمایہ وطن واپس لانے کا دوسروں سے مطالبہ کرتے ہیں ۔ مگر خود اپنا سرمایہ واپس لانے پر تیار نہیں ہیں ۔ انہوں نے کہا کہ اگر ماضی میں عدلیہ آزاد ہوتی تو آج حکمران طبقے کی لوٹ مار کا خاتمہ ہو چکا ہوتا ۔ لیکن موثر احتساب نہ ہونے کی وجہ سے یہ سلسلہ آج بھی جاری ہے۔ انہوں نے کہا کہ صدر زرداری کے لئے عوامی اعتماد کی حامل عدلیہ بوجھ بنی ہوئی ہے۔ حکمران ایسی عدلیہ چاہتے ہیں ۔ جو ان کے ایک اشارے پر فیصلے کرے اور ان کی کسی بھی غیر آئینی ، غیر اخلاقی حرکت پر آنکھیں بند رکھے ۔ مگر اب وہ دور گزر گیا ۔ اعلی عدلیہ چیف جسٹس کی قیادت میں متحد ہے۔ اور فیصلے ڈکٹیشن پر نہ کرنے کا عزم کرچکی ہے۔ 16 کروڑ عوام کی اکثریت عدلیہ کی پشت پر ہے۔ لہذا اب ججوں کو ڈرا دھمکا کر فیصلے حاصل نہیں کئے جاسکتے ۔ عمران خان نے کہا کہ پرویز مشرف کو محفوظ راستہ دے کر حکمرانوں نے عوامی مینڈیٹ سے غداری کی ۔ قوم پرویز مشرف کو اکبر بگٹی کے قتل ،سانحہ لال مسجد ،لاپتہ اور امریکہ کے حوالے کئے گئے شہریوں اور لوٹ مار کا حساب چاہتی ہے۔ مگر حکمرانوں نے ڈیل کرکے اقتدار حاصل کرلیا اور مشرف کو محفوظ راستہ دے کر ملک سے فرار کرا دیا ۔ عمران خان نے کہا کہ ہماری جماعت میں کسی جاگیردار ، سرمایہ دار ، لٹیرے اور آزمودہ سیاستدان کی کوئی گنجائش نہیں ۔ ہم عوام کی حمائت سے ملک میں انقلاب لائیں گے اور انصاف کو عام کریں گے ۔ لٹیروں کا کڑا احتساب ہوگا ۔ مراعات یافتہ طبقہ سے تمام مراعات واپس لے لی جائیں گی ۔ عوام کو صحت وتعلیم کی بہترین سہولیات فراہم کی جائیں گی ۔ ہم نوجوانوں کو ترقی کرنے کے لئے بہترین اور سازگار ماحول فراہم کریں گے ۔ انہوں نے کہا کہ نوجوان ہمارا سرمایہ اور مستقبل ہیں ۔ یہی طبقہ انقلاب کا ہراواں دستہ ہے۔ انہوں نے نوجوانوں سے کہا کہ وہ شاہین بننے کے لئے اقبال کے کلام کا مطالعہ کریں اور ہر معاملہ میں قرآن و سنت سے رہنمائی لیں۔
|
