وزیر اعظم کی کار پر حملے کیخلاف پیپلز پارٹی کا احتجاج

اردو ٹائمز(نیوز)پیپلز پارٹی لاہور کے کارکنوں نے وزیر اعظم یوسف رضا گیلانی کی کار پر حملے کے خلاف مال روڈ پر احتجاجی مظاہرہ کیا ہے۔پیپلز پارٹی لاہور کے درجنوں کارکن وزیر اعظم کی کار پر حملے کی اطلاع ملتے ہی مال روڈ پر جمع ہوگئے اور "جمہوریت پر حملہ نامنظور" اور دہشت گردی مردہ باد کے نعرے لگائے۔ پی پی پی پنجاب کے جنرل سیکرٹری غلام عباس اور دیگر مقررین نے وزیر اعظم یوسف رضا گیلانی پر حملے کی مذمت کی اور الزام عائد کیا کہ حملے کے پیچھے آصف علی زرداری کے ایوان صدر پہنچنے کے مخالفین کا ہاتھ ہوسکتا ہے۔مظاہرین نے ایک گھنٹے تک مال روڈ کی ایک سائیڈ پرٹریفک بلاک رکھی اور کہا کہ جمہوری نظام کے خلاف سازشیں قبول نہیں کی جائیں گی۔