ٹیم نے فتح کا سفر شروع کر دیا ہے‘ چیئرمین پی سی بی

 لاہور(این این آئی)پاکستان کرکٹ بورڈ کے چیئرمین اعجاز بٹ نے کہا ہے کہ ویسٹ انڈیز کے خلاف شاندار کارکردگی کا مظاہرہ کرکے قومی ٹیم نے ثابت کر دیا ہے کہ پاکستانی ٹیم آج بھی بہترین ٹیم ہے اور ابوظہبی سے اس نے فتح کا نیا سفر شروع کر دیا ہے اور انشاءاللہ جلد ہی قومی ٹیم کا شمار دنیا کی ٹاپ ٹیموں میں ہوگا ۔یہاں صحافیوں سے گفتگو کرتے ہوئے انہوںنے کہا کہ ویسٹ انڈیز کے خلاف ون ڈے سیریز جیتنے سے پاکستان کی ٹیم کی آ ئی سی سی رینکنگ میں بہتری آئی ہے اور اب یہ رینکنگ بہتر ہی ہوتی جائے گی ۔اعجاز بٹ نے ایک سوال کے جواب میں بتایا کہ بھارت کے خلاف ہوم سیریز کا انحصار ملک کے سیکورٹی حالات پر ہے اگر حالات ٹھیک نہ ہوئے تو سیریز کسی تیسرے مقام پر کھیلنے کا آپشن موجود ہے اور آئی سی سی کے فیوچر پروگرام میں بھی تبدیلی ہو سکتی ہے ۔انہوںنے کہا کہ محمد یوسف نے آئی سی ایل جوائن کرنے سے پہلے ان سے کوئی رابطہ نہیںکیا تاہم ان کا معاملہ عدالت میں ہے اور وہ اس میں کسی قسم کا تبصرہ نہیں کر سکتے ۔اعجازبٹ نے کہا کہ وہ صحافیوں سے اسلئے بچتے ہیں کہ وہ کہتے کچھ ہیں اور وہ لکھتے کچھ ہیں اور ہمیں چکر میں ڈال دیتے ہیں ۔