ممبئی دہشتگردی میں پاکستانی حکومت ملوث نہیں ، بھارت

 نئی دہلی(این این آئی)بھارت نے کہاہے کہ ممبئی حملوں میں ملوث دہشت گردوں کا تعلق پاکستان سے ہے تاہم پاکستانی حکومت اس میں ملوث نہیں ۔بھارت کے نائب وزیر داخلہ شکیل احمد نے برطانوی نشریاتی ادارے کو انٹرویو میں کہا کہ ممبئی میں حملے کرنے وا لے دہشت گردوں نے پاکستان میں عسکریت پسند گروپوں سے تربیت لی تھی۔ اس کا یہ مقصد نہیں کہ حکومت پاکستان بھی اس میںملوث ہے۔ یہ عمل غیر ریاستی عناصر کا تھا اور حکومت پاکستان کا اس میں کوئی ہاتھ نہیں۔ دوسری جانب برطانوی اخبار دی ٹائمز نے انسداد دہشت گردی کے مغربی ماہرین اور تجزیہ کاروں کے حوالے سے کہاہے کہ ممبئی دہشت گردوں کا مقصد نو منتخب صدر باراک اوباما کا القاعدہ کے خلاف منصوبہ ناکام بناناہے کیو نکہ اوباما پاکستان اور بھارت میں مصالحت کراکر القاعدہ اور طالبان کے خلاف کارروائی کرانا چاہتے ہیں۔